नागपूर - वारांगनेचा हट्ट पुरविण्यासाठी अनेक बॅंकांना लाखोंचा गंडा घालणाऱ्या भामट्याला पोलिसांनी शनिवारी अटक केली. इम्रानखान जलीलखान (वय २८) असे त्याचे नाव असून, तो छिंदवाड्यातील रहिवासी आहे.
क्सीचालक असलेल्या इम्रानचे गंगाजमुनातील एका वारांगनेवर प्रेम जडले. मात्र, तिने त्याला महिन्याला साठ हजार द्यावे लागतील, अशी अट घातली. ती पूर्ण करण्यासाठी इम्रानने बॅंकांना गंडविण्याचा सपाटा लावला. दुसऱ्याच्या नावाचे धनादेश मिळविल्यानंतर बनावट स्वाक्षरी करून त्याने बॅंक ऑफ इंडियाच्या शंकरनगर, धरमपेठ, सदर शाखा, पंजाब नॅशनल बॅंकेची लकडगंज शाखा, स्टेट बॅंक ऑफ इंडियाची गीतांजली, छावनी, इतवारी शाखा, सेंट्रल बॅंक आणि बॅंक ऑफ महाराष्ट्रच्या सीताबर्डी शाखा, अशा ९ बॅंकांना त्याने पाच ते सात लाखांचा गंडा घातला.
सात महिन्यांत पाच ते सात लाख रुपये प्रेयसीवर उधळल्यानंतर तो आज सकाळी साडेदहाला बॅंक ऑफ इंडियाच्या झांशी राणी चौक शाखेत गेला। त्याने दिलीप काळे यांचा धनादेश ३८६३५१ विड्रॉलसाठी दिला. १५ हजारांची रक्कम असल्यामुळे रोखपाल खातरजमा करण्यासाठी व्यवस्थापक वसंत पोरम यांच्याकडे गेले. धनादेशावर असलेली स्वाक्षरी पाहून व्यवस्थापक पोरम यांना शंका आली. त्यांनी स्वत:चे समाधान करून घेण्यासाठी दिलीप काळे बणून बॅंकेत आलेल्या इम्रानला त्याच्या वडिलाचे नाव विचारले. गडबडलेल्या इम्रानने भलतेच नाव सांगितले. त्यामुळे पोरम यांनी त्याला गप्पात रंगवून सहकाऱ्यांच्या मदतीने धंतोली पोलिसांना बोलावून घेतले.
पोलिस निरीक्षक रामरतन यादव यांच्या मार्गदर्शनाखाली हवलदार राजेंद्र सरोदे, रवी फलके, धनराज सरोदे, श्याम दुल्हारे यांनी त्याला ताब्यात घेतले. चौकशीदरम्यान इम्रानने सांगितलेली त्याची "प्रेमकथा' ऐकून पोलिस आणि पत्रकारही स्तंभित झाले. वारंगनेच्या प्रेमात पडलेला टॅक्सीचालक इम्रान आता पोलिसांच्या कोठडीत आहे.
कोई टिप्पणी नहीं:
एक टिप्पणी भेजें