नाशिक, २३ जुलै-वाहनांच्या माध्यमातून वाढती गुन्हेगारी आणि नियमांची पायमल्ली रोखण्यासाठी शहर वाहतूक शाखेबरोबरच आता आरटीओ कार्यालयानेदेखील वाहनांच्या नंबरप्लेट्सवर लक्ष केंदीत केले आहे. त्यामुळे यापुढे 'प्रेस', 'पोलिस' अशा प्रकारची नावे अथवा लोगो टाकण्यासाठी परवानगी घ्यावी लागणार आहे.
टारगट तरुणांचे 'कोयला'सारखे ग्रुप्स, पक्षाचे ध्वज, 'प्रेस' अशी अनेक नावे आणि लोगो यांनी 'नंबर'प्लेट्स व्यापलेल्या असतात। कित्येकदा नंबरप्लेट्सचा मूळ उद्देशच दूर राहिलेला दिसतो. विशेष म्हणजे या माध्यमातून आपण पोलिस असल्याचे सिद्ध करण्याचा आणि सर्वांना दाखवून देण्याचा मोह पोलिसही आवरू शकलेले नाहीत. ही सर्व धडपड ओळख पटवून देण्यासाठी. कुटुंबातील ज्येष्ठांपासून ते पोराबाळांपर्यंतच्या विविध नावांनीही नंबरची जागा बळकावल्याचे दिसते
वाहनधारकांच्या या हौसेमुळे वाहनचोर, गुन्हेगार, भुरटे चोर यांचे फावले आहे। वाहनावर नंबर टाकला नाही, अथवा केवळ दुबिर्णीतून पाहता येईल एवढ्याच आकारात नंबर टाकला तर ते चोरांच्या पथ्यावरच पडते. एखाद्याला धडक देऊन अथवा मुलींची छेड काढून पळून जाणाऱ्यांच्या वाहनांचे नंबर न दिसल्याने ही मंडळी पोलिसांच्या जाळ्यातून सहज सुटतात.
हे प्रकार थांबावेत यासाठी शहर वाहतूक शाखेने गेल्या महिन्यापासून नंबरप्लेट्सवर नंबरशिवाय इतर कुठलेही नाव अथवा लोगो असलेल्या वाहनांवर कारवाई सुरू केली आहे। मात्र, तरीही अनेक तरुण 'शूरवीरां'नी आपला प्रताप सुरूच ठेवला आहे. नियमभंगाची गंभीर दखल घेत, थेट आरटीओ कार्यालयाने अशा वाहनधारकांवर कारवाईची तयारी सुरू केली आहे. 'कोणत्याही वाहनाच्या मालकाला नंबरप्लेटवर नंबरव्यतिरिक्त अक्षरे, अंक, शब्द, चित्र किंवा स्टिकर्स लावता येणार नाहीत. तसे करण्यास मोटार वाहन नियम १९८९ अन्वये बंदी आहे.
नंबरशिवाय इतर कोणतीही अक्षरे किंवा लोगो लावण्यासाठी वाहतूक आयुक्तांची पूर्वपरवानगी घ्यावी लागेल', असा आदेश आरटीओ अधिकाऱ्यांनी काढला आहे. आरटीओ आणि शहर वाहतूक शाखा यांच्या संयुक्त मोहीमेतून नंबरप्लेट्सवरचे 'प्रेम' दूर व्हायला वेळ लागणार नाही.
