बीजिंग, १३ अगस्ट-ऑलिंपिकमध्ये पहिल्या दिवसापासून जिगरबाज खेळ करून ऑलिंपिकच्या बॅडमिंटन स्पर्धेच्या क्वार्टर फायनलमध्ये धडक मारणा-या सायना नेहवालचं आव्हान अखेर आज संपुष्टात आलं. जागतिक क्रमवारीत ३० व्या क्रमांकावर असलेल्या इंडोनेशियाच्या मारिया युलान्तीनं तिला नमवलं.
सामन्याची सुरुवात झाली, ती सायनाच्या बाजूनं। तिनं पहिला गेम जिंकला, पण त्यासाठी तिला बरंच झगडावं लागलं. २०-१६ अशी सायना आघाडीवर होती. पण सलग चार पॉइंट मिळवत युलान्तीनं बरोबरी केली. मग शेवटी नेटजवळ थरारक खेळ करत सायनानं हा गेम २८-२६ असा जिंकला. तिच्यातला आत्मविश्वास स्पष्ट जाणवत होता आणि तो स्वाभाविकही होता. कारण, आधीच्या सामन्यात वर्ल्ड रँकिंगमध्ये पाचव्या स्थानावर असलेल्या हाँगकाँगच्या चेन वँगचं आव्हान तिनं दणक्यात परतवून लावलं होतं.
पण दुस-या गेममध्ये मारियानं आपले काही ठेवणीतले शॉट्स खेळत सायनाला सतावलं. हा गेम तिनं २१-१४ असा जिंकला. त्यामुळे दबावाखाली आलेली सायना तिस-या गेममध्येही प्रभावहीन ठरली आणि हा गेम तिनं १५-२१ असा गमावला. या पराभवामुळे सायना ऑलिंपिकमधून बाहेर पडली आहे. भारतीयांच्या पदकाच्या आशा त्यामुळे मावळल्या आहेत. आता सगळ्यांचंच लक्ष आहे, पेस-भूपती जोडीकडे.
