औरंगाबाद - मोहिनी विद्येच्या बळावर पैसे दुप्पट करण्याचे व गुप्तधन काढून देण्याचे आमिष दाखवून तीनजणांना सुमारे सव्वासात लाख रुपयांचा गंडा घालण्यात आला. सय्यद मोईन सय्यद आमीर (वय ४३), शेख मेराज शेख पाशा (दोघेही रा. गांधीनगर) अशी आरोपींची नावे आहेत. मुख्य आरोपी सय्यद मोईन याला अटक करण्यात आली आहे.
पोलिसांनी दिलेल्या माहितीनुसार, पद्मपाणी कॉलनी, रेल्वेस्टेशन येथील तरुण धनंजय वामनराव गायकवाड (वय २९) याची सय्यद मोईन याच्याशी दोन वर्षांपूर्वी ओळख झाली. भेटीगाठींमुळे ओळखीचे रूपांतर मैत्रीत होण्यास वेळ लागला नाही. धनंजयची आर्थिक परिस्थिती सुदृढ असल्याचे मोईन, मेराज यांनी हेरले व त्याला बनविण्यास सुरवात केली. मोईनला मोहिनी विद्या येते. त्याद्वारे मोईन अशक्य गोष्टीही शक्य करतो, असा बनाव मेराजने केला. धनंजयला ते खरे वाटले. धनंजयचा विश्वास बसल्याचे पाहून मोईनने मोहिनी विद्येद्वारे पैसे दुप्पट करता येतात, असे त्याला सांगितले.
धनंजयला त्याची भुरळ पडली। मोईनने धनंजयचा पूर्ण विश्वास बसावा म्हणून दर्ग्यात जाऊन शपथ घेतली. त्यानंतर धनंजयने ८० हजार रुपये त्याला दिले; पण मोईनचे समाधान झालेच नाही. त्याने पुन्हा दोन लाख रुपयांची मागणी केली. धनंजयने त्याची ही मागणीही पूर्ण केली. मोईनच्या कथित मोहिनी विद्येची भुरळ पडलेल्या धनंजयने चुलत भाऊ गिरीष गायकवाड व मेहुणा रवींद्र मुळे यांनाही मोईनला पैसे द्यायला लावले. त्यानंतर सुरू झाला मोईनचा बनवाबनवीचा खेळ. कधी पंचधातूंची अंगठी करायची, तर कधी रात्रीला गंडेदोरे करायचे असे सांगून मोईन व मेराज त्यांच्याकडून पैसे उकळत राहिले. पाच लाख ९५ हजार रुपयांचा गंडा घातल्यानंतर त्यांनी गुप्तधनाचा नवा फासा टाकला. मला गुप्तधन दिसते, काढता येते, असे सांगून मोईनने त्यांना बनविणे सुरू केले.
मोईनवर प्रचंड विश्वास बसल्यामुळे या तिघांनी त्याला ११ तोळे सोने दिले. त्यानंतर आज पैसे मिळतील, उद्या मिळतील, असे करून त्याने टोलवाटोलवी सुरू केली. पैसे तर देऊन बसले आता विश्वास ठेवण्याशिवाय तिघांजवळ पर्याय नव्हता. त्यामुळे सलग दोन वर्षे ते त्याच्या बनवाबनवीस खरेच समजत राहिले. बनवाबनवीची मर्यादा संपल्यानंतर त्यांनी त्याला निक्षून विचारले. तेव्हा त्याने माझे कोणी काही वाकडे करूच शकत नाही, असे त्यांना धमकाविणे सुरू केले. त्यामुळे धनंजयने क्रांती चौक पोलिस ठाणे गाठून तक्रार दिली. त्यावरून मोईन व मेराजविरुद्ध फसवणुकीचा गुन्हा दाखल करण्यात आला आहे. पोलिस निरीक्षक दौलतराव मोरे यांच्या मार्गदर्शनाखाली मुख्य जमादार प्रकाश दांडगे अधिक तपास करीत आहेत.
कोई टिप्पणी नहीं:
एक टिप्पणी भेजें