मुंबई, ३१ ऑगस्ट-मुंबईतल्या गुन्हेगारी टोळ्यांमध्ये एकेकाळी प्रचंड दरारा असलेले एन्काउंटर स्पेशालिस्ट पोलिस निरीक्षक प्रदीप शर्मा यांना शनिवारी पोलिस सेवेतून बडतर्फ करण्यात आले आहे। ११२ गुंडांना चकमकीत ठार करणारे शर्मा यांच्यावर कुख्यात ‘ डी ’ कंपनीला मदत करणे तसेच हजारो कोटीची बेहिशीबी मालमत्ता ठेवण्याचे गंभीर आरोप होते.यासंबंधात शर्मा यांची पोलिस विभागातर्फे खातेनिहाय चौकशी करण्यात आली होती. या चौकशीत शर्मा दोषी आढळल्यानं कलम ३११ अंतर्गत त्यांना पोलिस सेवेतून बडतर्फ करण्यात आल्याचं वृत्त आहे.
१९८३ साली महाराष्ट्र पोलिस दलात सामिल झालेले शर्मा अंमली पदार्थ विरोधी पथकात असताना पहिल्यांदा प्रकाशझोतात आले होते. मुंबई पोलिस दलातील विविध विभागांमध्ये त्यांनी उपनिरीक्षक आणि निरीक्षक म्हणून काम केले आहे. मुंबई पोलिसांचे खंडणी विरोधी पथक, गुन्हे अन्वेषण विभागातही त्यांनी काम केले होते. शिवाय मुंबईतल्या डी.एन. नगर पोलिस ठाण्यातही ते काही काळ कार्यरत होते.
प्रदीप शर्मा यांची अमरावती येथे बदली करण्यात आली होती. मात्र तिथला कार्यभार त्यांनी स्वीकारला नव्हता. त्यानंतर आजारपणाचे कारण दाखवून त्यांनी मुंबईत परत बदली करवून घेतली होती. शर्मा यांना काही काळ सेवेतून निलंबित करण्यात आले होते.
मुंबई पोलिस दलात असताना प्रदीप शर्मा यांनी काही कुख्यात गुन्हेगारांना मदत केली असल्याचा गंभार आरोप कुख्यात गुंड छोटा राजनने न्यूज चॅनलशी बोलताना केला होता. शिवाय शर्मा यांनी एक हजार कोटी रूपयांची बेहिशेबी मालमत्ता साठवल्याचा आरोपही करण्यात आला होता.
यापूर्वी बेहिशेबी मालमत्ता ठेवल्याच्या आरोपातून मुंबई पोलिस दलातील इन्सपेक्टर दया नायक यांना पोलिस दलातून काढून टाकण्यात आले होते.
