महाराष्ट्र कॉंग्रेस प्रदेशाध्यक्षपदी माणिकराव ठाकरे यांची निवड

मुंबई, १७ अगस्त - प्रभाराव यांची हिमाचल प्रदेशच्या राज्यपालपदी नियुक्‍ती करण्यात आल्याने रिक्त झालेल्या महाराष्ट्र कॉंग्रेस प्रदेशाध्यक्षपदी अखेर माणिकराव ठाकरे यांची निवड करण्यात आली.

निवडीबरोबरच जयवंतराव आवळे यांच्याकडे प्रदेश शाखेचे कार्यकारी अध्यक्षपद, गुरूदास कामत यांच्याकडे प्रचार आणि प्रसिद्धी समितीचे अध्यक्षपद, तर मुंबई शहर कॉंग्रेसच्या अध्यक्षपदी कृपाशंकर सिंह यांची निवड करण्यात आली आहे.

कॉंग्रेस अध्यक्षा सोनिया गांधी यांच्याकडून रविवारी ही घोषणा करण्यात आली.

पंजाबमध्ये अनेक गावांना पुराचा वेढा

जालंधर, १७ अगस्ट- सतलज नदीकाठच्या छित्ती बेन बंधा-याला तडा जाऊन बंधारा १०० फुटांपर्यंत फुटल्याने आलेल्या पुरात लोहियन परिसरातील असंख्य गावे जलमय झाली. पूरग्रस्तांच्या मदतीसाठी लष्कराला पाचारण करावे लागले.

हा बंधारा सतलजला जेथे मिळतो त्या मुंडीकलू या गावात फुटला. शुक्रवारी मध्यरात्री ही घटना घडताच पुराचे पाणी झपाट्याने नजिकच्या गावांत पसरले. आजूबाजूच्या १० गावांमध्ये आठ ते दहा फूट पाणी साचले. पूरपरिस्थितीचा अंदाज घेण्यासाठी हवाई पाहणी करण्यात आली. त्यानुसार, पुरात अडकलेल्यांना सोडवण्यासाठी लष्करी बोटी वापरून तातडीने मदतकार्य सुरू करण्यात आले.

बंधाऱ्याच्या दुसऱ्या बाजूला असलेल्या मैदा, सज्जनवाल, मखी, सिंदरुर, खोसा, नवनपिंज खारोवल आदी गावांनाही पुराचा जोरदार तडाखा बसला.

फेडरर-वावरिंका जोडीने सुवर्ण जिंकले

बिजींग, १७ ऑगस्ट-जागतिक क्रमवारीत पहिल्‍या क्रमांकाचा टेनिस खेळाडू म्‍हणून ओळख असलेल्‍या रॉजर फेडरर आणि त्‍याचा सहकारी स्तानिसलास वावरिंका यांच्‍या जोडीने शनिवारी बिजींग ऑलम्पिक खेळांमध्‍ये युगुल टेनिस स्पर्धेत सुवर्णपदक जिंकले आहे.
टेनिस कोर्टवर गेल्‍या पाच वर्षांपासून आपले वर्चस्‍व गाजवित असलेल्‍या फेडरर आणि वावरिंका यांनी एकत्र येउन स्वीडनचे सायमन एसपेलिन आणि थॉमस जोहानसन यांना ६-३, ६-४, ६-७, ६-३ ने हरवून स्विझरलॅण्‍डसाठी पदक जिंकले आहे।
ऑलम्पिकमध्‍ये गेल्‍या वेळी दोन वेळा अपयशाचा सामना करावा लागलेल्‍या फेडररने सुवर्णपदक जिंकल्‍यानंतर पचंड जल्‍लोष केला.