बीजिंग, १६ अगस्ट-भारतीय बॉक्सिंगपटू मेडल मिळविण्याच्या शर्यतीत आगेकूच करत असून अखिल कुमारनंतर ५१ किलो वजनी गटात जितेंद्रकुमारनेही उपांत्यपूर्व फेरीत धडक मारली आहे. त्याने उजबेकिस्तानच्या तुलाश्बॉयला १३-६ अशा फरकाने पराभूत केले.
बीजिंग ऑलिंपिकमध्ये शनिवारची सुरूवात अॅथलेटिक्समध्ये काहीशी निराशाजनक झाल्यानंतर भारताच्या जितेंद्रकुमारने बुद्धी आणि कौशल्याची शानदार सांगड घालत प्रतिस्पर्धी उजबेकी बॉक्सरला चांगले नमोहरम केले. या लढतीत आक्रमणाबरोबरच बजावही तितका सुंदर केल्याने त्याला हे यश मिळवता आले.
चार राउंडमध्ये झालेल्या या लढतीत पहिल्याच राउंडमध्ये जितेंद्रने ४-१ अशी आघाडी घेतली. तुलाश्बॉय याला तीन राउंडपर्यंत केवळ तीनच अंक मिळवता आले. त्यामुळे तो लढतीत अनेकवेळा वैतागला आणि चिडून त्याने जितेंद्रकुमार याला दोनवेळा खाली पाडले. परंतु, त्याच्या या आक्रमतेला मनोधर्याने आणि चतुराईने सामना करत जिंतेद्रने विजश्री खेचून आणला.
आता पुढील सामना जिंकल्यावर जितेंद्र कुमारलाही निश्चित पदक मिळू शकते. आता भारतीय क्रीडा रसिकांच्या नजरा अखिलकुमारनंतर जितेंद्रकुमारवरही लागून राहिल्या आहेत.
