हिंजवडीतील "इन्फोसिस'च्या एका इमारतीला आग

पिंपरी - हिंजवडी औद्योगिक वसाहतीमधील फेज-एक मधील इन्फोसिस कंपनीतील दहा क्रमांकाच्या इमारतीला बुधवारी रात्री अकरा वाजण्याच्या सुमारास आग लागली.

अग्निशामक दलाच्या कर्मचाऱ्यांना तासाभरातच आग आटोक्‍यात आणण्यात यश आले. या घटनेत जिवीतहानी झालेली नाही.

बदली नाकारणाऱ्या अधिकाऱ्यांवर निलंबनाची कारवाई - उपमुख्यमंत्री

जयसिंगपूर - पोलिस महानिरीक्षक ते उपनिरीक्षकपदापर्यंतच्या अधिकाऱ्यांच्या बदल्यांचे जारी झालेल्या आदेशाला ज्यांनी अद्याप प्रतिसाद दिलेला नाही. अशा अधिकाऱ्यांवर कडक कारवाई करण्याचा निर्णय उपमुख्यमंत्री आर. आर. पाटील यांनी घेतला आहे. बदली होऊनसुद्धा बदलीच्या ठिकाणी हजर न होणाऱ्या अधिकाऱ्यांवर निलंबनाची कारवाई करण्याचे आदेशही मंत्री श्री. पाटील यांनी दिले आहेत.

राज्यात गेल्या महिन्यात जिल्हा पोलिसप्रमुख, अतिरिक्त पोलिस आयुक्त, उपअधीक्षक, पोलिस निरीक्षक, सहायक पोलिस निरीक्षक आदी अधिकाऱ्यांच्या बदल्या झाल्या. त्याप्रमाणे बहुतांशी अधिकारी तातडीने बदली झालेल्या ठिकाणी हजरही झाले. मात्र काही अधिकाऱ्यांनी बदलीच्या ठिकाणी हजर न होता आजारी रजा काढून बदली रद्द करण्याचे किंवा सोयीच्या ठिकाणी बदली करून घेण्याचे जोरदार प्रयत्न सुरू केले आहेत. त्यासाठी अनेक लोकप्रतिनिधी उपमुख्यमंत्री श्री. पाटील यांना वारंवार भेटू लागले आहेत. त्यामुळे अनेक जागा पोलिस अधिकारी हजर न झाल्यामुळे रिक्त राहिल्या आहेत. तर ज्यांच्या बदल्या झाल्या आहेत तर ज्यांच्या बदल्या झाल्या आहेत पण त्यांच्या जागी दुसरा अधिकारी न आल्याने त्यांना "रिलिव्ह' न करण्याचे धोरण अनेक जिल्हा पोलिसप्रमुखांनी अवलंबले आहे.

मल्लिका शेरावतप्रकरणी याचिका १४ ऑगस्टपर्यंत राखून ठेवली

मुंबई - दोन वर्षांपूर्वी नववर्षाच्या पूर्वसंध्येला पंचतारांकीत हॉटेलमध्ये "अश्‍लिल' नृत्य केल्याप्रकरणी बॉलीवुड कलाकार मल्लिका शेरावत तसेच अन्य दोन जणांवरील याचिका येथील स्थानिक न्यायालयाने ४ ऑगस्टपर्यंत राखून ठेवली आहे.

वकील शितला पांडे यांची बाजू ऐकल्यानंतर विनोद जैन यांच्या तक्रारीवर मुख्य सत्र न्यायाधिश जी. आर. वानखेडे यांनी गुरूवारी हा आदेश दिला.

या कार्यक्रमाचे वाहीनीवरून प्रसारण करण्यात आल्याचा दाखला देत विनोद जैन यांनी मल्लिका तसेच संबंधीतांविरूद्ध तक्रार दाखल केली होती. कार्यक्रमामध्ये तंग कपड्यातील मल्लिकाच्या अश्‍लिल नृत्यामुळे संस्कृतीबरोबरच स्त्रीवर्गाचे हनन झाल्याची तक्रार जैन यांनी दाखल केली होती. याप्रकरणी हॉटेल व्यवस्थापन तसेच कार्यक्रम आयोजकांवरही गुन्हा दाखल करण्यात आला.

या ४५ मिनिटांच्या कार्यक्रमासाठी मल्लिकाने तब्बल ७५ लाख रूपये घेतले होते.

सोमनाथ चटर्जी राजीनामा देणार नसल्याची चिन्हे

नवी दिल्ली - डाव्यांनी केंद्र सरकारचा पाठिंबा काढून घेतल्यामुळे लोकसभेचे सभापती सोमनाथ चटर्जी हे देखील आपल्या पदाचा राजीनामा देणार असल्याच्या चर्चेला पूर्णविराम मिळण्याची शक्‍यता आहे.

लोकसभा सचिवालयाने गुरुवारी प्रसिद्ध केलेल्या निवेदनातून श्री. चटर्जी राजीनामा देणार नसल्याचे स्पष्ट होते. ""लोकसभेचे कामकाज चालविताना सभापती हे कोणत्याही पक्षाचे प्रतिनिधित्व करीत नसतात. सभापतीपदी निवड झाल्यापासून श्री. चटर्जी यांनी सर्व प्रकारच्या राजकारणापासून स्वतःला दूर ठेवले आहे.'" अशा आशयाचे एक निवेदन मंगळवारी लोकसभा सचिवालयाने प्रसिद्ध केले.

श्री. चटर्जी सभापतीपदाचा राजीनामा देणार, अशा आशयाचे वृत्त काही माध्यमांमधून गेले दोन-तीन दिवस देण्यात येत आहे. त्या पार्श्‍वभूमीवर हे निवेदन देण्यात आले आहे. सभापती सारख्या महत्त्वाच्या पदावरील व्यक्तीला विनाकारण वादविवादात ओढू नये, असेही आवाहनही यात करण्यात आले आहे.

पंतप्रधान मनमोहन सिंग राष्ट्रपतींना भेटणार

नवी दिल्ली - डाव्या पक्षांनी सरकारचा पाठिंबा काढून घेण्याच्या पार्श्‍वभूमीवर पंतप्रधान मनमोहन सिंग जपानहून बुधवारी मध्यरात्री भारतात परतले असून आज गुरूवारी ते राष्ट्रपती प्रतिभा पाटील यांची भेट घेणार आहेत.

संसदेत बुहमत सिद्ध करण्यासंबंधी चर्चा करण्यासाठी राष्ट्रपतींनी पंतप्रधानांना भेटण्यासाठी बोलावले आहे. त्यामुळे गुरूवारी सायंकाळी त्यांची भेट होणार असल्याचे राष्ट्रपती भवनाच्या अधिकृत सूत्रांनी सांगितले.