चोवीस तासात नामफलक मराठीत

मुंबई, दि. १६ : "सर्व संस्था, दुकाने व आस्थापनांनी नामफलक मराठीत न लावल्यास महाराष्ट्र नवनिर्माण सेना मराठी स्टाईलने त्यांच्यापर्यंत पोहचेल' या इशाऱ्याने अपेक्षेपेक्षा आधीच राज ठाकरे यांचा हेतू साध्य झाला आहे. "राज ठाकरे' यांच्या इशाऱ्याची गांभिर्याने दखल घेऊन अवघ्या चोवीस तासात मुंबईतील वेलिंगकर इन्स्टिट्युट ऑफ मॅनेजमेन्ट तसेच एचआयटीने नामफलक मराठी केले आहेत.

महाराष्ट्र नवनिर्माण सेनेचे अध्यक्ष राज ठाकरे यांनी सोमवारी वांद्रे येथे आयोजित पत्रकार परिषदेत सर्व संस्था, दुकाने व आस्थापनांनी लवकरात लवकर मराठी नामफलक लावण्याचे आवाहन केले होते. तसेच महिन्याभरात संबंधितांनी नामफलक मराठीत न केल्यास महाराष्ट्र नवनिर्माण सेना मराठी स्टाईलने त्यांना उत्तर देईल असा इशरारा दिला होता. त्याची गांभिर्याने दखल घेऊन वेलिंगकर इन्स्टिट्यूट ऑफ मॅनेजमेन्टचे कार्यकारी संचालक उदय साळूंखे यांनी दुसऱ्याच दिवशी मराठी नामफलक लावले. त्याचप्रमाणे एनआयटीच्या दादर शाखेतही ताबडतोब मराइी नामफलक लावण्यात आला असून महाराष्ट्रातील सर्व शाखांमध्येही लवकरच मराठी नामफलक लावण्यात येतील अशी ग्वाही एनआयटीच्या विभागीय प्रबंधकांनी दिली आहे. महाराष्ट्र नवनिर्माण विद्यार्थी सेनेचे अध्यक्ष आदित्य शिरोडकर यांच्या मार्गदर्शनाखाली उपाध्यक्ष चेतन पेडणेकर, सचिन मोरे, रोहन सावंत, विशाल कोठार व किरण कदम यांनी ज्या ज्या शिक्षण संस्थांचे नामफलक मराठीत नाहीत त्यांना मनसेच्या वतीने पत्र देण्यात आले आहे. त्यामध्ये वेलिंगकर इन्स्टिट्यूट ऑफ मॅनेजमेंट, एनआयटी, जेटकिंग ऍपटेक, कॉम्प्युटर इन्स्टिट्युट, एमईटी, एचआर कॉलेज, केसी कॉलेज, लाला लजपत राय कॉलेज, खालसा कॉलेज, एस आय डब्ल्यू एम कॉलेज, केळकर कॉलेज, एस आय ई एस कॉलेज व एम के के कॉलेज, ओडूमल सहानी कॉलेज, नॅशनल कॉलेज व एम के के कॉलेज आदी मुंबईतील प्रमुख महाविद्यालयांना हे पत्र देण्यात आले आहे. या सर्व संस्था चालकांनी व महाविद्यालयाच्या प्राचार्यांनीही वेलिंगकर इन्स्टिट्युट व एन आय आय टी प्रमाणे लवकरच मराठीच नामफलके लावण्याच आश्र्वासन महाराष्ट्र नवनिर्माण विद्यार्थी सेनेच्या पदाधिकाऱ्यांना दिले आहे.