मुंबई, १३ अगस्ट- परप्रांतियांच्या विरोधात आघाडी उघडल्यानंतर आता मराठी रहिवाशांना हुसकावून लावण्याच्या प्रयत्नात असलेल्या बिल्डरांकडे महाराष्ट्र नवनिर्माण सेनेने (मनसे) मोर्चा वळवला आहे.
गिरगावातील मुगभाट लेन येथील भादण हाऊस बिल्डिंगच्या दर्शनी भागात जाहीर फलक लावून मनसेने आपली भविष्यातील वाटचाल स्पष्ट केली आहे। विभाग अध्यक्ष बबन महाडिक आणि उपविभाग अध्यक्ष श्रीधर जगताप यांच्या नावाने लावलेल्या या फलकांवर बिल्डरांना अप्रत्यक्ष इशारा आहे. तसेच, गिरगावातील मराठी कुटुंबांच्या मागे खंबीर उभे असल्याची ग्वाहीदेखील मनसेने दिली आहे.
भादण हाऊसमध्ये ३९ कुटुंबे आहेत। त्यापैकी १० जणांनी अद्याप विकासाला संमती दिलेली नाही. इमारतीच्या विकासाला आपला विरोध नाही. मात्र, विकासाबाबत काही मागण्या बिल्डरने पूर्ण कराव्या, असे रहिवाशांचे म्हणणे आहे. करारनाम्यात रहिवाशांना मिळणारे क्षेत्रफळ नमूद करावे, भविष्यात येणा-या मेन्टेनन्सचा खर्च भागवण्यासाठी बिल्डरने जुन्या रहिवाशांना द्यायच्या ५० लाख रूपये कॉर्पस फंडाचा उल्लेख करारनाम्यात करावा, पर्यायी जागेचे भाडे वाढून द्यावे, आदी मागण्या रहिवाशांनी केल्यात. या मागण्या पूर्ण केल्यास विकासाला परवानगी देऊ, असे रहिवाशांचे म्हणणे आहे.
त्यातच गेल्या आठवड्यात इमारतीचे बांधकाम पाडण्यास आलेल्या विकासकाच्या कामगारांशी रहिवाशांची बाचाबाची झाली. त्यावेळी इमारतीच्या रहिवाशांनी श्रीधर जगताप आणि श्रीकांत तेंडुलकर या मनसैनिकांच्या मदतीने हुसकावले. 'बिल्डरने रहिवाशांची चर्चा करून हा प्रश्न निकाली काढावा. अन्यथा मराठी माणसावर अन्याय करणाऱ्या विकासकांच्या विरोधात मनसेच्या पद्धतीने आंदोलन छेडण्यात येईल,' असा इशारा जगताप यांनी दिला आहे.
कोई टिप्पणी नहीं:
एक टिप्पणी भेजें