अहमदाबाद, १६ अगस्त-संपूर्ण देशाला हादरवून टाकणा-या अहमदाबाद तसेच जयपूरमधील विध्वंसकारी बॉम्बस्फोटांचा गुंता सोडवण्यात गुजरात पोलिसांना अखेर यश आले आहे. बंदी घातलेल्या ‘ सिमी ’ या अतिरेकी संघटनेनेच हे बॉम्बस्फोट घडवल्याचे उघड झाले आहे. इंडियन मुजाहिद्दीन ही संघटना सिमीचाच एक भाग असल्याचा दावा करतानाच , या कटाचा मास्टरमाइंड ‘ सिमी ’ कार्यकर्ता मुफ्ती अबु बशीर याला उत्तर प्रदेशातून अटक करण्यात आली आहे.
गुजरातचे पोलिस महासंचालक पी। सी. पांडे यांनी आज दुपारी पत्रकार परिषद घेऊन बॉम्बस्फोट कटाच्या सुत्रधारांना अटक करण्यात आल्याचे जाहीर केले. अहमदाबाद , जयपूरमध्ये झालेल्या बॉम्बस्फोटांमागे सिमी संघटनेचे अतिरेकीच असल्याचा ठाम दावा त्यांनी यावेळी केला. सिमी या संघटनेवर बंदी घातली असल्याने इंडियन मुजाहिदीन नावाने त्यांच्या कारवाया सुरु होत्या. या कटाचा मुख्य सुत्रधार अबु बशीर याला आज उत्तर प्रदेशातील आजमगढ येथून अटक करण्यात आली. त्याशिवाय याआधीच सफदर नागोरी या सिमीच्या प्रमुखाला ताब्यात घेण्यात आले आहे. याप्रकरणी आतापर्यंत दहा आरोपींना केरळ , कर्नाटक , महाराष्ट्र आणि गुजरातच्या विविध भागांतून अटक करण्यात आली आहे , असे पांडे यांनी सांगितले.
गुजरातमध्ये बॉम्बस्फोट घडवण्यासाठी तब्बल ४० जणांना खास ट्रेनिंग देण्यात आली होती. केरळच्या जंगलामध्ये त्यांना ट्रेनिंग देण्यात आले. बॉम्बस्फोटांचा कट आखण्यासाठी बडोदा , मुंबई आणि अहमदाबाद येथे सिमी कार्यकर्त्यांच्या बैठका झाल्या. यातील एक बैठक युनूस याच्या घरी झाली होती. एप्रिल २००८ मध्ये हा कट आखण्यात आला. स्फोटांसाठी वापरण्यात आलेली स्फोटके बाहेरच्या राज्यातून आणण्यात आली. त्यांची जुळणी मात्र अहमदाबादमध्ये करण्यात आली , अशी माहिती पोलिसांनी दिली. या कटाचा तपास करण्यात राजस्थान व महाराष्ट्र पोलिसांनीही मोलाची मदत केल्याचे त्यांनी सांगितले.
कोई टिप्पणी नहीं:
एक टिप्पणी भेजें