मुंबई-राज्याचे शालेय शिक्षणमंत्री वसंत पुरके पुन्हा एकदा वादाच्या भोव-यात सापडलेत. यावेळी, शाळांमध्ये सेक्स एज्युकेशन शिकवण्याचा मुद्दा त्यांच्या अंगाशी आलाय. लैंगिक शिक्षण शिकवण्यास विधानसभेनं स्थगिती दिली असतानाही, गेल्या आठवड्यात पुरके सरांनी या विषयाबद्दल आग्रही भूमिका घेतली होती. त्यामुळे भाजपच्या आमदार शोभाताई फडणवीस यांनी आज त्यांच्याविरोधात हक्कभंग दाखल केला आहे.
शालेय शिक्षणात, लैंगिक शिक्षण या विषयाचा समावेश करण्याचा विषय अलीकडे खूपच गाजला होता. परंतु त्याहीआधी, गेल्या वर्षीच विधानसभेत या विषयावर जोरदार चर्चा झाली होती. त्यावेळी अध्यक्ष बाबासाहेब कुपेकर यांनी हा विषय शिकवण्याला स्थगिती दिली होती. असं असतानाही, शिक्षणावरील चर्चेला उत्तर देताना वसंत पुरके यांनी, सेक्स एज्युकेशन शिकवण्यावरून आग्रही भूमिका मांडली. त्यांच्या या भाषणाकडे लक्ष वेधून, हा सभागृहाचा अवमान असल्याचा मुद्दा शोभाताई फडणवीस यांनी उपस्थित केला. भंडारा जिल्ह्यात अनेक शाळांमध्ये हा विषय शिकवला जात असल्याचंही त्यांनी निदर्शनास आणलं.
बाबासाहेब कुपेकर यांनी हा हक्कभंग दाखल करून घेतला असून पुरकेंना स्पष्टीकरण करण्याचे निर्देश दिले आहेत. विरोधी पक्षनेते रामदास कदम यांनी पुरकेंच्या राजीनाम्याची मागणी केली आहे.
कोई टिप्पणी नहीं:
एक टिप्पणी भेजें