मुंबई, ३ अगस्ट-मेट्रो प्रकल्पातील पहिल्या टप्प्यातल्या तीन विविध कामांसाठी 'मुंबई मेट्रो वन' कंपनीने तीन कंपन्यांना कंत्राटे दिली आहेत. यात वीजपुरवठा, सिग्नल यंत्रणा, ट्रेन कंट्रोलिंग व तीन विशेष पूल बांधण्याच्या कंत्राटांचा समावेश आहे. ही कंत्राटे अनुक्रमे एबीबी, सीमेन्स व स्यू कन्स्ट्रक्शन कंपनीला दिली असल्याचे मुंबई मेट्रो वन प्रा. लि. चे संचालक कृष्णप्रसाद माहेश्वरी यांनी सांगितले.
मेट्रोच्या मार्गावर वीजपुरवठा तारा उभारणे, त्यांची चाचणी करणे व वीजवितरण व 'स्काडा' यंत्रणा (सुपरवायझरी कंट्रोल अँड डेटा अॅक्विझिशन) उभारण्याचे काम एबीबी कंपनी करेल। दिल्ली मेट्रो रेल्वेच्या पहिल्या टप्प्याचा (४५ रुट किमी) वीजपुरवठाही याच कंपनीने उभारला. दुसऱ्या टप्प्याचे (१२१ रुट किमी) कामही हीच कंपनी करत आहे.
सिग्नल यंत्रणा या क्षेत्रातील दादा कंपनी सीमेन्स करेल। या ११.४० किमी लांबीच्या पहिल्या टप्प्यातील सिग्नल यंत्रणा उभारण्याचे काम सोपवले आहे. २५ टक्के वीजबचत करणारे'एलझेडबी ७०० एम' तंत्रज्ञान वापरून हे सिग्नल बसतील. दिल्ली मेट्रोच्या तिसऱ्या लाइनवरील (लांबी : २५ किमी) सिग्नलही सीमेन्सनेच अवघ्या १६ महिन्यांत बसवले. जगभरात जर्मनी, कोरिया, ऑस्ट्रिया, चीन, थायलंड अशा विविध देशांमध्ये तब्बल ७५० किमी लांबीच्या मेट्रो लाइन्सवर सीमेन्सनेच सिग्नल आहेत.
मेट्रो जिथे वेस्टर्न एक्सप्रेस हायवे ओलांडेल, तिथे केबल स्टे पूल असेल. तसेच मेट्रोच्या या मार्गावर अंधेरी स्टेशन व मिठी नदी परिसरात कँटिलिव्हर पूल असतील. स्यू कन्स्ट्रक्शन्स ही कंपनी व्हीएसएल कंपनीच्या सहकार्याने २० महिन्यांमध्ये या तीन पुलांचे काम पूर्ण करेल. या तीनही कंत्राटांसह संपूर्ण मेट्रो रेल्वेचे काम ३० महिन्यांत पूर्ण करण्याचा निर्धारही माहेश्वरी यांनी व्यक्त केला.
कोई टिप्पणी नहीं:
एक टिप्पणी भेजें