नवी दिल्ली, २४ जुलै-सोमनाथदांना डाव्यांनी डच्चू दिल्यावर गुरुवारी पंतप्रधान मनमोहन सिंग यांनी त्यांची भेट घेतली. त्यांच्या या भेटीत काय गुफ्तगू झाले हे कळले नसले तरी या भेटीमागे राजकीय समीकरणे असल्याचे स्पष्ट होत आहे.
गेली ४० वर्षे संसदेत कम्युनिस्ट गडाचा आधारस्तंभ असणा-या सोमनाथ चटर्जी यांनी फक्त एकदा पक्षादेश पाळला नाही , म्हणून त्यांना दरवाजा दाखवण्यात आला. माकपच्या या निर्णयाविरुद्ध देशभर नाराजीचे वातावरण तयार झाले असून सोमनाथदांना सहानुभुती मिळत आहे. कदाचित याच वातावरणाचा परिणाम म्हणून पंतप्रधान सोमनाथदांना भेटायला गेले असतील , असे म्हटले जात आहे.
खरं तर येत्या शुक्रवारी आपला ८०वा वाढदिवस साजरा करणा-या चटर्जी यांना पक्षाने दिलेला झटका अनपेक्षित नव्हता. पण तरीही या निर्णयावर चटर्जी यांनी कोणतीही प्रतिक्रिया दिलेली नाही. पुढील महिन्यात कॉमनवेल्थ संसदीय बैठकीसाठी आपण क्वालालांपूरला जाणार आहोत , असे त्यांनी बुधवारीच स्पष्ट केले आहे. या घडामोडींमुळे पुढील काही दिवसात सोमनाथदांचे काय होणार याकडे सा-यांचे लक्ष लागून राहिले आहे.
कोई टिप्पणी नहीं:
एक टिप्पणी भेजें