इस्लामाबाद, १८ अगस्त-गेली नऊ वर्षे पाकिस्तानवर सर्वार्थाने हुकूमत गाजवणा-या ‘ मुशर्रफ राज ’ ची आज अखेर इतिश्री झाली. राष्ट्राध्यक्ष परवेझ मुशर्रफ यांनी आज दुपारी राष्ट्राध्यक्षपदाचा राजीनामा देऊन पाकिस्तानला ‘ अलविदा ’ केले. ते संयुक्त अरब अमिरातीच्या आश्रयाला गेले असून, आता मुशर्रफ यांची गादी कोण सांभाळणार, याबाबतची उत्सूकता ताणली गेली आहे. पाकच्या इतिहासात प्रथमच एका महिलेला राष्ट्राध्यक्षपद देण्याच्या हालचाली सुरु झाल्या आहेत.
पाकिस्तानच्या संसदेत लष्करशहा मुशर्रफ यांच्याविरोधात महाभियोग खटला सुरु होणार होता. पेशाने आणि वृत्तीने फौजी असलेले मुशर्रफ या खटल्याचा समर्थपणे मुकाबला करतील, अशी अटकळ होती. परंतु जनरलनी लोकशाहीशी दोन हात करण्याऐवजी शस्त्र खाली टाकणेच पसंत केले. त्यापूर्वी त्यांनी पाकिस्तानच्या जनतेला उद्देशून इमोशनल भाषण केले. आपणावरील सर्व आरोप खोडून काढतानाच, त्यांनी राष्ट्राध्यक्षपदाचा राजीनामा देण्याची घोषणा केली. पदत्याग करताना त्यांचा चेहरा रडवेला झाला होता. पाकिस्तानी जनतेला खुदा हाफिज करत ते पायउतार झाले आणि विमानाने सौदी अरेबियाला रवाना झाले.
कोई टिप्पणी नहीं:
एक टिप्पणी भेजें